တစ်ခါက
တစ်ဘ၀ များ…
ည
၁၁နာရီကျော်လောက်မှာ ဗာဘူးနီးယားမြို့ (Vavuniya) ကိုရထားဆိုက်တော့ မှောင်မဲနေတဲ့
ရထားပေါ်မှာ အေးအေဆေးဆေး လူရှင်းတဲ့အထိ ထိုင်စောင့်နေပြီးမှ ဆင်းခဲ့ပါတယ်..၊ ရထားကလည်းဒိထက်ရှေ့ဆက်မသွားတော့ပါ..၊
စစ်ဒဏ်ကြောင့် ရှေ့မှာရထားလမ်းအပိုင်းအစတွေ နဲ့ဘူတာရုံအပျက်တွေဘဲရှိပါတော့မယ်.၊ဒီမြို့က
နောက်ဆုံးအစိုးရထိမ်းချုပ်ထားတဲ့မြို့ဖြစ်ပြီး ဒီမြို့ကစပြီး မြောက်ဖက်ကို တမီးအီလန်း
အယ်လ်တီတီအီးကျားသူပုန်တွေ ထိမ်းချုပ်ထားပါတယ်..၊အေကေ ၄၇ကိုင်ထားတဲ့ အစောင့်တွေက လူတွေနဲ့အိပ်တွေကို
စစ်ဆေးပြီးမှ ဘူတာကထွက်စေပါတယ်..၊
အစောင့်တွေက ကျွန်တော်တို့လို နိုင်ငံခြားသားတွေကို
သိပြီးသားဖြစ်ပုံ တစ်ချက်ကြည့်လိုက်ပြီး အိပ်ကို ၀ိတ်ကျေတန်းကျေလောက်ဘဲ စစ်ပြီးသွားခွင့်ပြုလိုက်ပါတယ်..၊
တကယ်တော့ ကိုလံဘိုနဲ့ ဗာဘူးနီးယား ခရီးက နှစ်ပတ်တစ်ခါလောက်သွားနေရတော့ သိပ်တော့မဆန်းတော့ပါ..၊
ဒီလိုနဲ့ မှောင်မိုက်နေတဲ့ လမ်းမအတိုင်း ကျောပိုးအိပ်တစ်လုံးနဲ့ တစ်ရွေ့ရွေ့လမ်းလျှောက်ပြီးခရီးဆက်ခဲ့ပါတယ်..၊
တကယ်တော့ သုံးဘီးငှားစီးလို့ရပေမယ့်..၊ သိပ်မဝေးတဲ့ခရီး ဖြစ်တာကြောင့်တစ်ကြောင်း ကိုယ်ခြေထောက်က
သုံးဘီးထက်ပိုစိတ်ချရတာက တစ်ကြောင်းလည်းပါတယ်..၊ စစ်ဖြစ်နေတဲ့တိုင်းပြည်တစ်ပြည်ရဲ့
အစွန်ဆုံးအစိုးရထိမ်းချုပ်ထားတဲ့ မြို့ဆိုတော့ အစစ အရာရာသတိထားတာအကောင်းဆုံးပေါ့ဗျာ..၊
-------------------xxxxxx----------------------
မောင်တောမြို့
ကို ၀င်တဲ့လမ်းနှစ်ခုရှိတယ် ဘူးသီးတောင် ကနေလာတဲ့လမ်းနဲ့ စစ်တွေတစ်ဘက်ကမ်း အငူမော်ကနေ
တဆင့်ပင်လယ်ကမ်းခြေအတိုင်းလာတဲ့ အလယ်သံကျော်လမ်း၊ အလယ်သံကျော်လမ်းအတိုင်းလာရင် မောင်တောမြို့မ၀င်ခင်
ဘယ်ဘက် အခြမ်းက ရွာကလေးတရွာရဲ့ အိမ်ဝင်းတစ်ခုအနောက်ဘက်ကို ဖြတ်ပြီး အသွားကွမ်းခြံတစ်ခု
နောက်ကိုရောက်သွားတော့ ထူးဆန်းတဲ့လူတစ်ယောက်ကို အမှတ်မထင်ဘွားကနဲ့ တွေ့လိုက်တယ်..၊
သူကရှောင်ပုန်းဖို့ကြိုးစားပေမယ့် ရုပ်တရက်တွေ့လိုက်လို့မလုံမလဲဖြစ်သွားပုံရတယ်..၊
ဘယ်လိုဘယ်လို အာရပ်လူမျိုးတစ်ယောက်က ဒီကိုရောက်နေပါလိမ့်..၊ ဒီအချိန်မှာဘဲ မိတ်ဆွေအဘိုးကြီးက
မိတ်ဆက်ပေးလိုက်တယ်..၊ ဒါကျွန်တော့် ညီအငယ်တဲ့..၊ အဲ့ဒီတော့မှ အသားအရည်လတ်လတ်နဲ့ အလွန်သန့်ပြန့်နေတဲ့
အာရပ်ကြီးက မြန်မာလိုပီပီသသ ရည်ရည်မွန်မွန် မိတ်ဆက်လာတယ်..၊ သူက ဆော်ဒီအာရေဗျနိုင်ငံမှာနေပြီး
အလုပ်အကိုင်ကတော့ ဘာသာရေးခေါင်းဆောင် ဗလီဆရာတစ်ယောက်ပါ..၊
-----------------------xxxxxx------------------------
အချိန်က
၁၉၉၀ ခုနှစ် ဆောင်းရာသီ ညတစ်ည..၊ စစ်ကိုင်းတိုင်းအဆုံး ကချင်ပြည်နယ်အစ ကျောက်စိမ်းမှော်တစ်ခု၊
အတိအကျပြောရရင် မိန်းမ မလာရတဲ့ ကျောက်စိမ်းမှော်..၊ ၊ လက်နက်ကိုင် စစ်သား ၃ ယောက် နဲ့
အထမ်းသမား ၄ ယောက် ဟာ ကျောက်စိမ်းတွင်းတွေနဲ့ ခပ်ဝေးဝေး မှောင်မိုက်နေတဲ့ တောအုပ်ကြီးထဲမှာ
စမ်းတ၀ါးဝါး သွားနေလေရဲ့..၊ အဲ့ဒီအထဲက အသက်အငယ်ဆုံး ပေါတာ ကလေး ကျွန်တော်က နောက်ဆုံးမှာ
အလေးဆုံးအိပ်ကြီးကို ထမ်းရင်းရှေ့ကလူနောက်ကို ကြိုးစားလိုက်နေရပါတယ်..၊ မှောင်လိုက်တာမှ
ရှေ့တဲ့တဲ့ကလူကို တောင်မမြင်ရဘူး..၊ တစ်ခါတစ်ခါတိုက်မိသေးရဲ့…၊ စကားလည်းမပြောရဲ..၊
ဓာတ်မီးလည်းမထိုးရဲ..၊ ရှေ့က ကိုထွန်းက အကြံပေးတယ် ဟေ့ရောင် မင်းကျောပိုးအိပ်ထဲမှာ
လစ်ပိုတွေ ကပ်လိုက်ရှိတယ် အသာယူသောက်ပြီး လွင့်ပစ်လိုက်၊ ဒီလိုနဲ့ ဂျောက်ကြီးတစ်ခုကို
ဖြတ်လှဲထားတဲ့ သစ်လုံးကြီးတစ်ခု ပေါ်ကနေ လျှောက်ပြီး ဖြတ်ရတယ်..၊အောက် ကချောင်းကလည်း
ရေစီးသံတဟဲဟဲနဲ့ သတိထားပြီးမှောင်မှောင်မဲမဲထဲမှာ ကျောပိုးအိပ်အလေးကြီးထမ်းရင် သစ်လုံး
ကြီးကို ခြေထောက်နဲ့စမ်းရင်ရှောက်ရတော့ နောက်ဆုံးမှာ ပြတ်ကျန်ခဲ့တယ်..၊ ဂျောက်ဟိုဘက်ထိပ်မှာ
ကမ္ဘားတစ်ခုကို ကုပ်တက်ရစဉ် မြေကြီးထစ်တွေက ချောနေတော့ ဓားမြှောင်နဲ့ စိုက်ပြီးထိမ်းရသေးတယ်..၊
အားလုံးအပေါ်ရောက်ပြီး ကမ္ဘားစောက်တစ်ဝက်မှာ တစ်ယောက်ထဲကျန်နေစဉ်မှာဘဲ..၊ ရုပ်တစ်ရက်ဓာတ်မီးရောင်တွေဝင်းကနေပေါ်လာပြီး
သေနပ်မောင်းတင်သံတွေဆူညံသွားတယ်..၊ အမှောင်ထဲကနေ “ဟေ့ကောင်တွေလက်နက်ချ တစ်ယောက်မှမလှုပ်နဲ့..၊”
သွားပြီ…၊ မတ်စောက်နေတဲ့ ကမ္ဘာဘေးက ခြုံပုတ်တစ်ခုအောက်ကိုဝင်ပြီး ကမ္ဘား ကိုဓားမြှောင်နဲ့
အားကုန်စိုက်ပြီး တွယ်ကပ်ပြီးပုန်းနေလိုက်တယ်..၊ အပေါကနေငုံကြည့်ရင်ဘယ်လိုမှ မမြင်ရနိုင်..၊
လေးလံလှတဲ့အိပ်ကြီးကလည်း ချောက်ထဲကိုဆွဲချနေလေရဲ့..၊ဒီလိုနဲ့ ခဏပြန်တိပ်ဆိပ်သွားစဉ်
ရင်တွေတဒိတ်ဒိတ်ခုံရင်း နားစွင့်နေလိုက်တယ်…၊ “မင်းတို့လူဒါအကုန်ဘဲလား..” မေးသံကြားတော့
ကိုထွန်းရဲ့ တစ်ယောက်ကျန်သေးတယ်ဆိုတဲ့ အသံကို မိုးကြိုးပစ်သလိုကြားလိုက်ရတယ်…၊ အောက်ကမှောင်မဲနေတဲ့
ဘယ်လောက်နက်မှန်းမသိတဲ့ ချောင်းထဲကို ဖြုတ်ချလိုက်ရမလား လို့ စဉ်းစားနေတုန်း..၊ ဓာတ်မီးရောင်တစ်ခုအပေါ်ကကျလာပြီး
“ဟေ့ရောင်တက်ခဲ့ ပစ်လိုက်ရမလား”…၊
------------------------xxxxxxxx-----------------------
ကရင်ပြည်နယ်ရဲ့
နယ်စပ်မြို့ကလေးတစ်မြို့က စစ်တပ်တစ်တပ်လုံးအလှုပ်ရှုပ်နေကြသည်..၊ ရပ်ဟတ်ယဉ် သုံးစီးဟာ
ဘောလုံးကွင်းကြီးထဲကနေ တစ်စဉ်းပျံတက် တစ်စင်းပျံဆင်းနဲ့ ဒဏ်ရာရ လူနာ စစ်သားတွေနဲ့ ပေါတာတွေကို
သယ်နေကြလေသည်..၊ တိုက်ပွဲက အတော်ပြင်းထန်ပြီး ရာနဲ့ချီတဲ့ သွေးသံရဲရဲ လူနာတွေတစ်ဖွဲဖွဲ
အမိုးပွင့် ထရပ်ကားကြီးတွေနဲ့ရောက်လာနေကြသည်..၊ အဲ့ဒီအချိန်မှာ ဘော်လုံးကွင်းဘေး ပိတောက်ပင်ကြီးအောက်ကနေ
၅နှစ်ကျော်ကျော်ကလေးတစ်ယောက် တအံ့တသြငေးကြည့်နေလေရဲ့..၊ အဲ့ဒီအချိန်မှာ ပတ်တီးနဲ့သွေးတွေဗရပွနဲ့လူနာတစ်ယောက်က
ကရင်လို ဗလုံးပထွေးနဲ့အော်ပြောတော့ တစ်ယောက်က သူရဟတ်ယဉ်စီးဖူးတော့မယ်လို့ပြောတာဆိုဘဲ..၊
ဟုတ်တယ်အဲ့ဒီတုန်းက ကျွန်တော် အသက် ၆နှစ်မပြည့်လောက်သေးဘူး…၊
ပျင်းရိဘွယ်မှုန်မှိုင်းပြီး
စနိုးမုန်တိုင်းတွေ တစ်ဆိုင်းပြီးတစ်ဆိုင်းလာနေတဲ့ အမေရိကန်နိုင်ငံညတစ်ည မှာ ဘာရယ်မဟုတ်
အမှတ်တရ အပိုင်းအစတွေကို သတိရနေမိပါတော့တယ်..၊
ရန်မျိုး
(ကာရိုလိုင်းနား)
No comments:
Post a Comment